Regine Velasquez, babaeng kaladkarin!

Rey Pumaloy
Abante

Matutuwa si Pops Fernandez kapag nalaman niyang hanggang ngayon ay ina-acknowledge pa rin ni Regine Velasquez ang naging partisipasyon niya (Pops) sa kanyang (Regine) career.

Discoverer ang tawag ni Regine kay Pops dahil ito raw ang naka-discover sa kanya at ito rin ang nagpakanta sa kanya sa Penthouse Live noon na ang host ay sina Pops at Martin Nievera.

Sabi ni Regine, malaki ang naitulong ni Pops sa kanyang singing career matapos siyang manalo sa Tanghalan ng Kampeon noon.

Kuwento pa ni Regine, baguhan pa lang siya noon at wala talagang pangalan nang yayain siya ni Pops at pakantahin sa nasabing programa. Doon din daw siya nakita ng kanyang unang manager na si Ronnie Henares.

Ayon pa rin kay Regine, si Pops at ang iba pang mga super-singers sa showbiz ang rason kung bakit siya tumutulong sa mga baguhang artist ngayon.

"Noong bagu-bago pa lang ako, nagkaroon na ako ng chance na makipag-duet kay Martin Nievera. Nung mag-concert si Gary V., isa ako sa mga guests niya.

"I’m so lucky and blessed dahil ang daming sumuporta sa akin noong bagu-bago pa lang ako. ‘Yung mga sumuporta sa akin nu’ng mga panahong iyon, hinding-hindi ko talaga makakalimutan.

"The reason why I want to help new artists, because of what these big names in the industry did to me when I’m just starting.

"Hindi ako nahirapan na makapasok sa industry dahil sa kanila, kaya gusto ko ring iparamdam iyon sa ibang mga baguhang artists," kuwento pa ni Regine.

‘Yun din daw ang dahilan kung bakit madalas siyang nakikitang guest sa show ng iba’t ibang baguhang singer.

"Isa akong kaladkaring babae! I don’t know, nag-i-enjoy akong mag-guest sa mga shows. I feel fulfilled kapag ganu’n.

"Dumating na ako sa point ng career at buhay ko na gusto ko namang tumulong in my own little way at mag-enjoy.

"At kapag nakikita kong may show ‘yung mga friends ko, natutuwa ako sa kanila," masaya niyang sabi.

Hindi naman kataka-taka kung bakit sa 20 years ni Regine sa industry ay marami ang nagmamahal sa kanya at umi-idolo dahil sa kanyang kakaibang malasakit sa industriya.

Siyanga pala, showing na sa October 11 ang Till I Met You, ang reunion movie nila ni Robin Padilla, na dinirek ni Mark Reyes para sa GMA Films at Viva Films.