P100M mark para sa Till I Met You

Allan Diones
Abante Tonite

Ang aga ng calltime ng press pero hanggang sa makaalis kami ay wala pa sina Regine Velasquez at Robin Padilla sa victory party ng Till I Met You kamakalawa nang gabi sa Executive Lounge ng GMA.

May taping ng Pinoy Pop Superstar si Regine at aakyat lang daw ito saglit para bumati. Si Robin ay hindi namin alam kung saan manggagaling.

Sabi sa amin ni Direk Mark Reyes, so far ay nasa P40M na ang kinikita sa takilya ng Till I Met You mula nang magbukas ito nu’ng Oktubre 11.

Naniniwala kaming malakas ang TIMY dahil maging si Mr. Ric Camaligan ng SM Cinemas ay naringgan namin (nu’ng Sabado sa IMAX premiere ng Open Season) na kumikita ang Regine-Robin movie at sa tantiya nila ay aabot ito sa P100M mark.

Ayon kay Noel Ferrer (Project Development Head of Synergy and Publicity ng GMA Films), isang Valentine movie (Suddenly It’s Magic ang working title) ang next project na inihahanda ng GMA Films.

Nabanggit ni Ms. Annette Gozon-Abrogar (GMA Films President) na mula sa two films a year ay five films (or more) na ang ipoprodyus ng GMA Films.