Regine on Ogie and Robin

Rey Pumaloy

Abante

Sa halip na si Robin Padilla ang pag-usapan, si Ogie Alcasid pa rin ang naging bida sa interview ng entertainment writers sa presscon ng Till I Met U ng GMA Films at Viva Films.

Ewan ko ba, hanggang ngayon kasi ay ayaw pa ring mamatay-matay ang tsismis kina Ogie at Regine.

Sabi nga ng ibang manunulat, ayaw pa kasing umamin, kung may aaminin, para matapos na ang lahat.

Anyway, inamin ni Regine na pinigil niya ang pag-iyak sa SOP, dahil sa ginawang pagtatanggol sa kanya ni Ogie.

"One thing na natuwa ako nung ipinagtanggol niya ako. Nag-apologize siya sa akin, at sa family ko.

"Pinipigilan kong umiyak para walang masabi ang ibang tao. Kasi naman, nakaka-touch ‘yung ginawa niya sa akin.

"Close talaga kami ni Ogie. Nag-uusap kami sa phone kapag may problema kami. Palagi kaming magkasama sa trabaho. Nagtayo pa kami ng record label para tulungan ang mga bagong artist.

"Pero, nabibigyan ng kulay ‘yung mga ginagawa naming `yon. Ayoko sanang maapektuhan, pero pag nadadamay na kasi ang ibang tao. Nasasaktan na ako," seryosong sabi ni Regine.

Aminado si Regine, nahihiya siya kay Robin dahil ang mga tsismis sa kanila ni Ogie ang mas lumulutang ngayon.

"Nahihiya ako kay Robin, kasi nung lumabas ‘yung tsismis sa amin ni Ogie, gumagawa kami ng movie ni Robin. Siya ang leading man ko, siya ang kasama ko sa pelikula, pero si Ogie ang madalas na tinatanong sa akin.

"Seloso si Robin! Ayaw niya nang ganyan. Pero nagpapasalamat ako, kasi naiintindihan niya ang sitwasyon ko.

"Robin is very sweet. He’s very nice. Nung time na matindi ‘yung tsismis sa amin ni Ogie, nakikita niya sa mukha ko na affected ako, at gumagawa siya ng paraan para maging masaya ako o makalimutan ko `yon.

"I’m trying not to be affected, pero magaling si Robin na bumasa ng mukha ng tao.

"Lalapit ‘yan sa akin, magtatanong. Sabi niya, what’s wrong? Parang iba ka ngayon?
"Hindi ako nagsasalita. Ang gagawin lang niya, patatawanin lang niya ako nang patatawanin hanggang sa gumaan na ang loob ko," kuwento pa ni Regine.

Tanong pa rin ng entertainment press kay Regine, gmawa ba siya ng paraan na makausap noon ang misis ni Ogie na si Michelle van Eimeren na nasa Australia?

"Nahihiya ako kay Ogie. Nahihiya ako kay Michelle. Atsaka, wala rin naman ako sa posisyon na kausapin siya.

"Ini-explain ko naman kay Ogie ang lahat. Sabi niya, don’t worry about it.

"Hindi ko naman responsibilidad na kausapin si Michelle. You know what I mean. Mas na kay Ogie ang responsibilidad," tugon ni Regine.

Alam na alam ni Regine na hangga’t magkasama sila ni Ogie ay hindi mawawala ang tsismis sa kanilang dalawa.