‘Miss Saigon’ inisnab ni Regine

by : Gerry Ocampo

Journal Online

KUNG ang ibang Pinay singers ay atat na atat mapasama sa Miss Saigon, ibahin n’yo si Regine Velasquez, na kahit anong pilit ng agent dito sa ’Pinas na mag-audition sa Saigon, ’di interesado.

Pero dahil sa pagpupumilit ng manager, pinagbigyan din ng Songbird ang kahilingan ng agent na marinig ang boses sa isang pagtatagpo sa Manila Hotel.

Pasado ang boses ni Regine sa Saigon agent, pero ayaw pa ring gawin ni Regine ang papel na nagpasikat kay Lea Salonga sa abroad.

“Hindi ko talaga forte ang forte ni Lea. Pinadalhan nga nila ako ng kopya ng tape ng Miss Saigon para makita ko raw kung ano ang gagawin.

“Naka-underwear lang at naka-T-shirt ng GI habang nakayakap sa partner na Kano,” pahayag ni Regine sa presscon ng Till I Met You kamakailan.

“Sabi ko, ayaw ko. Hindi ko forte ang role. Sa iba na lang nila ipagkatiwala, kuntento na ako sa ginagawa ko ngayon. ’Di ko na kailangang lumabas sa Miss Saigon,” dagdag pa ng Songbird.

Going back sa Till I Met You movie nila ni Robin Padilla sa GMA Films, inamin ni Regine na ngayon pa lang niya nakikilala nang husto ang action star.

Nu’ng ginagawa raw nila ang naunang pelikulang Kailangan Ko’y Ikaw, pagkatapos ng eksena, bigla na lang siyang nawawala dahil nahihiya.

Sa Till I Met You lang niya nakilala nang husto kung sino talaga si Robin. Kung pagbabasehan ang sweetness ng dalawa, walang dudang may relasyon na nga sila.

Pero itinanggi ito ni Regine, although handang maghintay si Robin sa matagalang panliligaw sa leading lady.